Ndonjëherë, dhimbja e artikulacioneve, e muskujve ose e kockave është e fortë ose zgjat për disa ditë. Kur ndodh kjo, duhet të vizitoheni. Shumë prej sëmundjeve reumatizmale nuk dallohen lehtësisht në fazat e para. Mjekët reumatologë janë të trajnuar pikërisht për të hetuar dhe zbuluar shkakun e fryrjes dhe dhimbjes. Është e rëndësishme që fillimisht të bëhet diagnoza e duhur në mënyrë që të nisë sa më parë trajtimi i përshtatshëm. Disa probleme muskulo-skeletore përgjigjen më mirë ndaj trajtimit në fazat e para të sëmundjes. Këto sëmundje ndryshojnë ose përkeqësohen me kalimin e kohës. Reumatologu ynë i trajnuar bashkëpunon me pacientët në gjetjen e problemit dhe në hartimin e një programi të personalizuar trajtimi.
Gjatë një vizite diskutohet mbi simptomat tuaja, historinë mjekësore personale dhe familjare dhe mënyrën e jetesës. Reumatologu kryen dhe një ekzaminim të plotë fizik. Vlerësimi mund të arrihet nëpërmjet një ose më shumë testimeve diagnostikuese, si:
- Biopsia për të hetuar indet mbi shenjat e sëmundjeve autoimune.
- Analizat e gjakut për të kontrolluar funksionimin e mëlçisë dhe të veshkave.
- Testi i densitetit të kockave.
- Skaner CT, Rezonancë Magnetike MRI ose ekografi për të parë organet dhe strukturat.
- Grafia e gjoksit për të vlerësuar problemet e mushkërive.
- Testet e zemrës, si elektrokardiograma.
- Elektromiograma, që mat funksionimin e nervave dhe të muskujve.
- Endoskopia për të vlerësuar simptomat gastrointestinale.